Stefnumótunarfærni

Fyrra misseri
36 klukkustundir / 52 kennslustundir

Námskeiðslýsing

Í námskeiðinu Stefnumótunarfærni er fjallað með hagnýtum hætti um stefnumótun og stefnumiðaða stjórnun skipuheilda, svo sem fyrirtækja, stofnana og félagasamtaka. Fjallað er um eðli og tilgang stefnumótunar, mótun og stjórnun stefnumótunarferlis og hvernig greina má innra og ytra umhverfi skipuheildar.

Þátttakendur kynnast fjölbreyttum aðferðum við að greina menningu, auðlegð, stjórnskipulag, starfsemi og fjárhagslega stöðu skipuheildar. Einnig er fjallað um ytra starfsumhverfi, hagsmunaaðila, markaði, viðskiptavini og samkeppni. Niðurstöður greininganna eru dregnar saman með SVÓT-greiningu, settar fram í heildstæðu stöðumati og nýttar til að draga stefnumótandi ályktanir og gefa vísbendingar um mögulega framtíð.

Fjallað er um gildi skipuheildar, tilgang hennar og framtíðarsýn og hvernig þessir þættir mynda grunn að mótun stefnu. Þátttakendur læra að móta sóknaráætlun með meginmarkmiðum, starfsmarkmiðum og aðgerðum og leggja mat á raunhæfni hennar. Einnig er fjallað um framkvæmd, miðlun, eftirfylgni og reglubundið endurmat stefnu, tengsl stefnumótunar og verkefnastjórnunar og algengar hættur í stefnumótunarvinnu.

Loks er stefnumótun sett í samhengi við samtímann og framtíðina. Lögð er áhersla á fagmennsku, samfélagslega ábyrgð og sjálfbærni og hvernig þessi viðfangsefni tengjast stefnumótandi ákvörðunum og langtímaþróun skipuheilda.

Sérstök áhersla er lögð á að þátttakendur geti beitt hagnýtum aðferðum við stefnumótun, unnið með öðrum og miðlað niðurstöðum stefnumótunarvinnu með skýrum og faglegum hætti.

Umsjónarkennari

  • Dr. Helgi Þór Ingason (Netfang: heling@simnet.is).
  • Viðtalstímar í lok kennslustunda eða samkvæmt samkomulagi.

Námsmarkmið

Að loknu námskeiðinu hefur þátttakandi öðlast eftirfarandi þekkingu, leikni og hæfni:

 

Þekking

  • Þekkir eðli, tilgang og helstu hugtök stefnumótunar og stefnumiðaðrar stjórnunar.

  • Skilur helstu áfanga stefnumótunarferlis og tengsl stefnumarkandi hugsunar, áætlanagerðar og framkvæmdar.

  • Þekkir fjölbreyttar aðferðir við greiningu á innra og ytra umhverfi skipuheildar.

  • Skilur hvernig gildi, tilgangur og framtíðarsýn skipuheildar mynda grunn að mótun stefnu.

  • Þekkir uppbyggingu sóknaráætlunar og mikilvægi framkvæmdar, miðlunar, eftirfylgni og endurmats.

Leikni

  • Getur valið og beitt viðeigandi aðferðum til að greina innra og ytra umhverfi skipuheildar.

  • Getur samþætt niðurstöður greininga í SVÓT-greiningu, sett fram heildstætt stöðumat og dregið af því stefnumótandi ályktanir.

  • Getur nýtt niðurstöður stöðumats og SVÓT-greiningar til að greina vísbendingar um framtíðina og undirbyggja framtíðarsýn.

  • Getur sett fram og rökstutt gildi, tilgang og framtíðarsýn skipuheildar.

  • Getur sett fram og rökstutt sóknaráætlun með meginmarkmiðum, starfsmarkmiðum og aðgerðum.

  • Getur metið sóknaráætlun og lagt til viðeigandi fyrirkomulag framkvæmdar og eftirfylgni.

Hæfni

  • Getur tekið virkan og ábyrgan þátt í stefnumótunarferli.

  • Getur unnið með öðrum að stefnumótun fyrir raunverulega skipuheild.

  • Getur lagt rökstutt mat á stefnu, stefnuvalkosti og stefnumótandi ákvarðanir.

  • Getur greint faglegar, samfélagslegar og sjálfbærnitengdar afleiðingar stefnumótandi ákvarðana.

  • Getur miðlað niðurstöðum stefnumótunarvinnu í faglegri skýrslu og kynningu.

Lesefni

  • Helgi Þór Ingason og Haukur Ingi Jónasson: Stefnumótunarfærni 2.0. Iðnú, 2027. Öll bókin.

    Ítarefni verður kynnt þátttakendum í námskeiðinu.

Kennsluáætlun

Námskeiðið skiptist í 9 lotur.

  • Lota 1: Stefnumótun, fræði og hagnýting.

  • Lota 2: Stefna og stefnumótunarferlið.

  • Lota 3: Innra umhverfi – menning, auðlegð, stjórnskipulag, starfsemi og fjármál.

  • Lota 4: Ytra umhverfi – hagsmunaaðilar, markaðir, viðskiptavinir og samkeppni.

  • Lota 5: Samþætt stöðumat, SVÓT-greining og stefnumótandi ályktanir.

  • Lota 6: Gildi, hlutverk og framtíðarsýn.

  • Lota 7: Sóknaráætlun – meginmarkmið, starfsmarkmið og aðgerðir.

  • Lota 8: Framkvæmd, stefnukort, verkefnastjórnun og eftirfylgni.

  • Lota 9: Hlutverk stefnumótunarráðgjafa, fagmennska, ábyrgð og framtíð stefnumótunar.

Kennslufyrirkomulag

  • Námskeiðið byggist á spegilnámi. Þátttakendur hafa aðgang að markvissum veffyrirlestrum og öðru námsefni á Canvas (námskerfi Endurmenntunar) og er ætlast til að þeir kynni sér efnið fyrir staðlotur.

  • Námskeiðið skiptist í tvær staðlotur, hvor um sig tvo daga. Í fyrri staðlotu er unnið með fyrstu fimm lotur námskeiðsins og lýkur þeirri vinnu með samþættu stöðumati og SVÓT-greiningu. Í síðari staðlotu er unnið með lotur 6–9, frá mótun gilda, hlutverks og framtíðarsýnar til sóknaráætlunar, framkvæmdar og eftirfylgni.

  • Í staðlotum fer fram útdýpkun námsefnis með umræðum, ígrundun, tilfellagreiningum, einstaklingsvinnu og hópverkefnum undir handleiðslu kennara.

  • Þátttakendur vinna í hópum að raunhæfu verkefni þar sem mótuð er stefna og sóknaráætlun fyrir skipuheild.

  • Lögð er áhersla á virka þátttöku, samvinnu, faglega umræðu og miðlun niðurstaðna.

  • Í lok námskeiðsins kynna hópar afrakstur stefnumótunarvinnunnar og leggja fram stefnumótunarskýrslu.

  • Nákvæm dagskrá, undirbúningur og verkefnaleiðbeiningar eru birt á Canvas.

Námsmat, próf og verkefni

Gefið er STAÐIÐ eða EKKI STAÐIÐ fyrir námskeiðið. Námsmat samanstendur af eftirfarandi þáttum:

Próf úr efni námskeiðsins

Í lok námskeiðsins er lagt fyrir rafrænt heimapróf. Prófið tekur til efnis kennslubókar, veffyrirlestra og þess sem unnið hefur verið með í staðlotum. Nánari upplýsingar um fyrirkomulag og kröfur eru birtar á Canvas.

Hópverkefni / Stefnumótun skipuheildar

Þátttakendur vinna í hópum að stefnumótun fyrir skipuheild. Afurðir vinnunnar eru stefnumótunarskýrsla og kynning á niðurstöðum. Nánari leiðbeiningar og matsviðmið eru kynnt í námskeiðinu og birt á Canvas.

Ástundun og mæting
Lögð er rík áhersla á að nemendur mæti í tíma og séu vel með á nótunum. Til að standast námskeiðið þarf nemandi að skila minnsta kosti 75% mætingu nema ef um annað er samið við kennara vegna sérstakra aðstæðna. Mætingalistar ganga um bekkinn í hverri lotu og þátttakendur merkja við nafn sitt til stað­fest­ingar á viðveru sinni.

Vinnuálag og einingar

  • Námskeiðið Stefnumótunarfærni er hannað eins og það væri 6 ECTS-eininga námskeið í grunnnámi á háskólastigi samkvæmt Bologna-viðmiðunum um æðri menntun. Þannig er reiknað með að hver þátttakandi leggi á sig að minnsta kosti 120 klukkustunda vinnu í námskeiðinu. Til viðmiðunar má segja að hver þátttakandi leggi fram 36 klukkustundir í tímasókn, 36 klukkustundir í lestur og persónulega tileinkun námsefnis, og 48 klukkustundir í verkefnavinnu.
  • Að námi loknu fá nemendur afhent skírteini ásamt yfirlýsingu frá Nordica ráðgjöf ehf. sem lýsir inntaki námskeiðsins, kröfum og námsmati. Þátttakendur geta sýnt þessi gögn verðandi vinnuveitendum, ráðgjafarfyrirtækjum, og menntastofnunum ef hugur þeirra stendur til framhaldsnáms á þessu sviði.